1 مصانع بشرية

واحنا كمان عنا مصانع

اول مصنع بتدخل فيه دغري بعد الميلاد٬ بيعطوك فيه اسم وهوية

وقبل ما تطلع٬ بيعلقولك خرزة زرقة خوف الحسد والحساد

ثاني مصنع: مصنع البهايم والأغنام

بتدخل فيه طفل عندك مية سؤال وتساؤل. عن ماهية الكون٬ من وين احنا جايين وعشان شو٬ ولوين احنا رايحين

ولأنك خطر على بقية البشر٬ بيعملولك فرمتة للدماغ وبتطلع حافظ بس هالجواب:

لانه الله خلقنا هيك (الله ما خلقك٬ انت فعليا الله نكبك)

وعندك مصنع العرايس

بيجروا عليه انسان٬ كانت مبسوطة علي الشارع جنب الدار بتلعب

اول ختم بيختموا عليها انها بنت٬ والختم الثاني انها عورة.

وبعدين بتمر علي دائرة سلب الارادة٬ قتل الثورة وتحطيم الاحلام

ومن ثم تأتي عملية الافراغ٬ ثم الدحش

مكياج وفساتين٬ تبييض٬ تسمير٬ تخسيس ونحفان

بتتعلم كيف تخط قلم الحومرة علي تم مسكر ومخ فاضي

صوتها عيب واحسن بضاعة بتطلع من هالمصنع

الي بتستحي٬ عينيها فالارض٬ لا الها رأي ولا من مخها اشي بتسمع

من برة ملمعة ومن جوا مهزوزة٬ لاعمرها اخذت قرار ولا ذاقت طعم حرية

هي العروس الانسب ومربية الاجيال

معلش٬ حتي لو ما ربيتي انتي بس خلفي٬ واحنا بنحدف زِتْ وِرْ عل المصنع

……